Gruppe: Administrator
Rang: Lebende Forumslegende
Beiträge: 8321
Mitglied seit: 13.05.2008
IP-Adresse: gespeichert
|
In sächsischer Mundart(Meißen)
von Joachim Burkhardt
Mir Sachsen sin märschendehls gemiehdvolle Leide, villeichd is drum de Erinnerung an` Winder und Weihnachden so indensiv. Da hadden mir, zum Beischbiel, n`Weihnachtsmargd, wiesn heide blohß noch im Färnsähn gibt. Lauder gleene Buden, zwischen Radhaus un Abodege, ganz im Schadden von dr großen Geerche, Lichder un Beime, un das had nur so nach Danne un Wörschtschen gerochn. Vermummde un verhillde Margdfraun hm Bongbongs un Pfeffernisse verkooft, am scheensden warn de Pflaummänner, die warn aus Baggpflom`gemachd un ham wie e Schornschdeinfäscher ausgesähn. Aber s gab ooch Lamedda, Reichergärzchen un bunde Gucheln. Also werklich, das war, als ob mer sichs ausgedacht hädde. Nacher, im Grieche, war alles vorbei, un nachm Grieche war erscht rescht Kuddelmuddel. Da war blohß noch e ehlits`scher Boom midm roden Zeinchen drum un rodem Schdern ohm druff, da ham mr lieber weggeguckt.
Ehmal, das weeß`ch noch genau, ham mr in soner Bude ne Büramide gekooft, vier Gärzen, un wem mr se angebrannd had, has sichs gedrehd, immer rum, immer rum, un de Schadden an dr Dägge. Das war`n finf Schaafe, die sin alle im Greise ihrm Hirden nachgerannd. Vader had se drum Schepsdrehe genannd.
Vader had scheene Geschichden gewussd, un mir ham ihn immer geleechert, dasser was erzähln soll. Un dann war in dr Advendszeit immer viel Basdelei un Bäggerei, ich weeß noch, wie dr Gasofen gerauschd un gebuffd had, un wie`s war, wenn dr Schdolln, gebaggen nach Dräsdner Rezebden, mid Budder bebinseld worden is. Manchma ham mr Fichdenzweiche in de Ofenglud geschmissn, un sìs warm und gemiehdlch gewäsn. Un dann ham mr egal gefrachd, wie viel Dache sin`s denn blohß noch.
Ze Weinachden, am viernzwanchsden, sim mr immer in de Geerche gegang, un dr Basder had gesung un sich Miehe gegäm, hochdeitsch ze reden. Das mach mr alle so, grade wem mr woandersch hinkomm, un weil immer alle feixen, wem mr de Gusche uffmachn. Ehchendlich soll mr quadschen, wie eim dr Schnabel gewachsn is, alles andre glingt ooch blohß gomisch, un örchnd e schlaus Gärlchen had das ma >>frisierde Schnauze<< genannd. Un ewich de Sachsen im Gino un im Gabbared, immer wenn eener doòf is, musser sächs`sch babbeln, un nacher ganners nich rischdsch.
Nach dr Geerche sim mr heeme gemachd, iber de große Brigge odr iber de Eisbahnbrigge. Manchma is ooch noch e Zuch gekomm, ganz wenich Leide drinne, un de Gloggen ham geleided, meisdens had och Schnee gelächen. De Ginder ham ihrn Drasch gehabd un sin ganz rabblich un gribblich gewäsn, un manchma war`s ooch ganz schdille, un dann ham mr gehärd, wie under uns, uff dr Elbe, de Eisscholln sich geschdohßen und geriem ham.
" Wemmr ä Baar Laadschn hadd,
unn der eene is weck,
unn mr hadd bloß den andrn ...
da nudzn een alle beede nischd.
."Liebe dich selber, dann können dich die Anderen gern haben!
|
|
Suchen 
Kalender 
Galerie
Auktionen 
Top
Mitglieder 
Stats
Chat (0) new 
User-Map
Passwort zusenden 
Registrieren
