Gruppe: Administrator
Rang: Lebende Forumslegende
Beiträge: 8321
Mitglied seit: 13.05.2008
IP-Adresse: gespeichert
|
Besuch im Landdaach
Nee, off was unsor Scheff manschma fiehr bleede Ideen komm dud - e Bedriebsausfluch nach Dräsdn mid Besuch im Landdaach!
Ja, mir hamm dann eene Schdunde lang ohm offm Rang in dähm Saal gesessn, wo die undn Blähnahrdaachung haddn.
Vorhähr war ooch eene schmugge junge Dame da, die uns bißl was erzähld had ibor dähn Landdaach un de Abgeordnedn un so.
Ooch ibor de Diädn, die se krischn, un ab wann se eene Rende krischn un was se daderfiehr machn missn.
Das ledzde is am kirzesdn ausgefalln - nischd!
Ja, missn dun die nischd machn!
Un wenn die sisch nisch ee eeenzsches Mal zu eenor Sidzung sähn lassn, krischn die immor noch fasd zweedausend Euros im Monad.
Wennse hingehn, krischn se ungefähr viere.
Un da bin nisch bloß isch vor Freide leischd erreeded, sogar meinor Gudstn had mor angesähn, dasse rischdisch froh war, dasses unsre Abgeordnedn so guhd gehn dud.
Isch meene, isch habb mir ja ooch schonn manschma Sorschn gemachd um die.
Obses ooch guhd hamm im Landdaach?
Nascha, mir dun die doch bei so Wahlen wähln, so ohne Riggsischd un gnadnlos - un die missn das dann vier Jahre lang ausbadn.
Odor absidzn.
Mor weeß ja gahr nisch genau, was mor dähnen dadermid andun dud!
Schdelln Sie sisch vor, eenor had villeischd Hämmoriehdn!
Nee, da sinn mir alle erschdema sähr erleischdord gewähsn, dasse reen vom Finanzjelln hähr keene Nod leidn missn - die, die mir wähln dun.
Ooch die von dor EnBehDeh nisch.
Die warn ibrischens vollzählisch da.
Das siehd mor ja, wieviel Blädze in eim Blogg frei sinn un wieviel besedzd sinn.
Also insgesamd war heeschdens ee Driddl besedzd.
Es dad um e Gesedz gehn, was de Lähmsmiddl bedreffn dad. Kennzeischnungsbflischd odor so ähnlisch.
Wesvorweeschn daderbei nu grade de EnBehDeh vollzählisch dagewähsn is, das is mir e Rädsl.
Abor villeischd sinn das de Ärmsdn un kenn nisch offs volle Daachungsgeld vorzischdn.
Ja, währ nähmlisch nisch da is, krischd nisch das volle Geld.
Das is villeischd e bißl hard, abor irschendwo ooch gereschd.
Währ nisch da is, kann nischd vordien - das is iborall so. Un die, die da warn, die hamm sisch allordings ooch nisch iboranschdreng missn.
Einische hamm Zeidung gelähsn, einische hamm offm Gombjudor im Indornedz gesörfd, einische hamm Kreizwordsrädsl gemachd, einische hamm gedösd... nee, was die jeweilischn Rednor vorne gereded hamm... nee, seelisch geliddn had daderbei offnsischdlisch keenor von de Abgeordnedn.
Un widdor warn mir alle froh, dasses so is.
Schließlisch hamm mir dann noch midgekrischd, daß die ooch außorhalb vom Blähnahrsaal guhd umsorschd wern... an de Diehrn, an de Rolldrebbn, in dor Kandiehne, am Eingang... das Vorhäldnis von Abgeordnede zu Sischorheids-, Ordnungs- un Verwaldungskräfde wahr ungefähr eens zu eens.
Nee, se wern werglisch umheeschd un gebfleeschd unsre Volksvordrähdor.
Un mir sinn dann in dähr scheen Gewißheid heeme gefahrn, daß mir dähnen, die mir so in dähn Landdaach neinwähln in Sachsn, keen Schadn zufieschn dun.
Im Geeschndeel !
Dähnen gehds dord sowas von wohl, mor kann schon saachn - sauwohl!
Eduard Sachsenmeyer
http://www.sachsenmeyer-kabarett.de/
" Wemmr ä Baar Laadschn hadd,
unn der eene is weck,
unn mr hadd bloß den andrn ...
da nudzn een alle beede nischd.
."Liebe dich selber, dann können dich die Anderen gern haben!
|
|
Suchen 
Kalender 
Galerie
Auktionen 
Top
Mitglieder 
Stats
Chat (0) new 
User-Map
Passwort zusenden 
Registrieren
