Gruppe: Administrator
Rang: Lebende Forumslegende
Beiträge: 8321
Mitglied seit: 13.05.2008
IP-Adresse: gespeichert
|
Ieb`rhaubd war meine Großmudd`r ne bräschdsche Frau. Se is balde zähn Chahr dod, un isch du nor noch geläschndlisch an se denkn. Aw`r manschmaa fälld m`r ei, was mei Vad`r von`r orzähld had: de Schdiggschn von d`r Bimmelbahn un von d`r Gasschberre.Meine Großmudd`r had ähmd ihrn Gobb imm`r gönn dorchsedzn. Se had schdäds in`r gleen Schdadd geläbd mid berihm Döbb`rein.D`r Schdadd ihr Name war Frohborsch. Nu wollde se nadierlisch ooch maa raus un eweng rummgomm. Aw`r mei Großvad`r, d`r Dierarzd, brauchde sei Audo salw`r. Deswäschn is se imm`r mid d`r Bimmelbahn gefahrn. Da gam mei Vad`r so als gleen Chunge frihmorschens bei seine Mudd`r die im Schlafzimm`r vorm Schbieschl schdand un Schdaad machde.
Er frachde se:" Mudd`r, wasn los? Wohin willschn?"
Und se sachde:" Was solln los sinn? Nerschnds willsch hin, mei Gind, nerschnds."
Dad`rbei had se sisch vorm Schbieschl gedrehd un sich gefreid. Mei Vad`r mußde dann chedsmaa dorschs Wäldschn zorr Haldeschdelle loofn. D`r Zuhch gam, Leide hubbdn raus un rei. Mei Vad`r laschde bein Gondugd`r un sachde:" De Mudd`r will ooch mid, se gimmd glei:"
"Nuschaa, ward m`r", vorrgindede där.
Se wardedn eene Minude, zwee Minude, dreie, viere. Wär nisch offdauchde, war meine Großmudd`r. De Gleenbahn mußde aw`r zorräschde gomm zum Schnellzuhch nach Leibzsch. Da zoch d`r Logomodivfihr`r an d`r Leine un dudede dreimaa ib`r de Schdadd. Wäschn mein`r Großmudd`r. Nu grischdn ooch de Fahrgäste langsam Angsd um de Anschlisse. Se guggdn ooch ausn Waachnfensd`rn un frachdn:" Wasn bassierd? Mährd eich aus, ihr Dreedl`r!"
D`r Gondugd`r grischde vor Ärsch`r n rodn Nischl un blägde:" De Frau Dogdorn will mid, se gimmd glei!"
De Leide gingn zurigg off ihre Blädze un sachdn mid Räschbeggd:
"Eega de Frau Dogdorn."
Un da gam ooch schon meine Großmudd`r n Bärsch roffgegeuchd, gledderde in Zuhch, riggde ihrn neun Hud zorräschde un meende nor:" s gennde eeschndlisch anfang." Und d`r Zuhch fuhr ab.
Aw`r das war in d`r gudn aldn Zeid. Das Lähm blieb nisch so gemiedlisch. Erschd gabs Griesch un n Haufn Dode, un dann worde alles ganz and`rsch. Nor meine Großmudd`r gonnde sisch nisch undrei wärn. Se hadde numaa ihre Familsche un sorschde förr schedn.
Maa warn meine Dande un von där de Dochd`r ieb`r de griene Grense ausm Wesdn gegomm. Als se nu endlisch d`rheeme warn, sahn se von ohm bis undn dodaal vorrdreggd aus.
De Großmudd`r meend:" Ihr mißd eisch badn."
De neie Reschierung dad aw`r schbarn, wie gewehnlisch ahmds wars Gas abgeschdelld.
Da ging meine Großmudd`r ans Deelefon un rief n Dieregdor von d`r Gasanschdald an. Se ganndn sisch vom Görschngohr.
"Herr Gas`r", sachd se," wasn das förr ne eischnardsche Werdschfd. Meine Gind`r missn in de Wanne, un s gibd gee Gas. Wenn se Gondevidde hamm, schdelln ses an!"
Aw`r d`r Gas`r wollde nisch:" Isch gann off geen Fall! Befähl von ohm."
"Nor förr e halbes Schdindschn", sachd se, " dun se mir die Liewe. Se grihschn morschn, wenn se bei uns gomm, ooch e Schliggschn äschdn Gaffee."
Er schdreibde sich mäschdsch. Dann grischt sn doch noch rum. Un de Schdadd had förr ne halbe Schdunde Gas. In d`r Schdadd läbdn fimfdausnd Leide.
Meine Großmudd`r hadde ähmd n Gobb ganz förr sisch alleene.
von Guntram Vesper
sächsisches aus Frohburg
bearbeitet von randy am 23.05.2008 12:18:57
" Wemmr ä Baar Laadschn hadd,
unn der eene is weck,
unn mr hadd bloß den andrn ...
da nudzn een alle beede nischd.
."Liebe dich selber, dann können dich die Anderen gern haben!
|
|
Suchen 
Kalender 
Galerie
Auktionen 
Top
Mitglieder 
Stats
Chat (0) new 
User-Map
Passwort zusenden 
Registrieren
